Tankou nan anpil lòt peyi , an Ayiti, yo fete st Valenten 14 fevriye, yon dat yo konsakre pou anmoure ak anmourez , zanmi ak zanmi pou yo manifeste santiman youn pou lòt epi fè echanj kado, chokola, flè elatriye.
Pa bò lakay nou, 14 fevriye te toujou genyen kè kontan lagete, epi yo konsidere tou kòm yon fèt komèsyal kote anpil kat ak chokola vann pou tijèn ak granmoun vin achete.
Ensekirite nan Leogane , kote tijèn ap tonbe san rezon pa bay moun gou gen kè kontan, vòl , gwo komèsan ak ti komèsan ap sibi, ensekirite nan Matisan , wout bloke, timachann, gwo machann, machin prive kou piblik pa ka pote tèt yo al achete chokola desann nan zòn sid, lese frape ant gang ak gang , lapolis ak gang , sivil pa epanye, vyòl , vòl , kidnapin se pase pran map pase rele w. Gran sid ak rès lwès la pa ka konekte ak kapital potoprens.
Anmwey gadon peripesi pou mwen , nou menm anmoure ak anmourez ki swete ofri yon chokola ak moun ki fè kè nou bat fò a, yon anmoure/anmourez, yon zanmi, yon fanmi.
Mwen tande vwa ki di pase pa bato, esi m tap jwen yon tiplas atò , pafwa pa menm gen jilè sovtaj. M ta reziye m pase anlè, rale wout apye manje mònn ak pousyè men lè m rive potoprens kidnapin ka di men mwen, kote m pral jwen gwo lajan ameriken pase pa jakmèl, oubyen Okay al pran avyon pou mennenm kapital dèyè moso chokola. 32 kilomèt nou te ka fè nan 1è tan sanble a wout Neil Armastrong te fè pou l depoze pye l sou lalin.
Chokola ra, lajan m ba, yon to enflasyon kap galope, ou pa ta di chomaj ak lavi chè abite menm kote, yo gen menm randevou, ekonomi peyi m bese plat.
Andedan peyi m politik se pataje gato, chokola ap gaspiye nan primati ak palè nasyonal ,sèl pataj ki rete pou anmoure se soti nan kalerès , jwen sekirite pou fè tibo san kè sote, jwen elektrisite pou lavi souri nan maryaj andedan legliz St Bernadette nan Matisan.
Mwen santim bouke , bouke! Monte desann chèche chokola.
Wi se vre, 14 fevriye se yon gwo jou men se jou tou pou nou sonje nou gen yon peyi pou nou sove.
St Valentin pran katouch, kè nou ap senyen, an nou swete li pa mouri, n ap espere nou menm tou nou gen lavi, petèt lòt ane solèy lanmou a donnen chokola, matisan pap denye bout potoprens, machann ap sikile lib elibè fwa sa st Valenten a soti nan koma, lè sa a ma di w mwen renmen w Ayiti.
Yvena Colas
Comentarios